Þegar nám þyngist

Hægt er að hlusta á textann með því að smella á spilarann neðst á síðunni. 

Með markvissum aðferðum og góðum stuðningi í skóla og heima læra börn með lestrarerfiðleika yfirleitt að lesa þótt leshraði sé oft hægari og stafsetning verri en hjá þeim sem ekki eiga í neinum erfiðleikum.

Lestrarnámið tekur mikinn tíma og það reynir mikið á börnin og foreldra þeirra.

Lestrarnámið er stöðug vinna og reynslan sýnir að ef nemendur hætta að æfa sig þá fer þeim aftur.

Þegar námsefni þyngist og lesgreinar koma til sögunnar er mikilvægt að nýta sér þau hjálpartæki sem bjóðast og stuðla að því að nemendur geti orðið sjálfstæðir námsmenn.

Helstu hjálpargögn eru tölvur og forrit þeim tengd.

• Hægt er að fá talgervla sem lesa allt námsefni upp um leið og barnið fylgist með lestrinum. Þótt barn þurfi ekki stöðugt að nota talgervil við allan lestur getur verið gott að nota hann þegar það er orðið þreytt, t.d. við próflestur.
• Einnig er hægt að fá leiðréttingarforrit og orðabækur (sjá nánar undir þjónusta/tölvutækni).
• Þá er hægt að fá flest námsefni í grunnskóla á hljóðbókum, en við notkun þeirra er mikilvægt að barnið hlusti og fylgist jafnhliða með lestrinum. Með því móti þjálfast það einnig í lestrinum auk þess að tileinka sér innihald efnisins betur (sjá nánari leiðbeiningar undir þjónusta/hljóðbækur).

Heimanám eykst og þyngist eftir því sem lengra líður á grunnskólann og því er mikilvægt að stuðla að góðum námsvenjum í gegnum það.

Ef heimanám reynist of íþyngjandi fyrir barnið og heimilið er nauðsynlegt að tala við kennara barnsins og komast að samkomulagi um hvernig best sé að haga því. Kennarinn veit að börn þurfa einnig að hafa tíma til að þroska sig á öðrum sviðum og vinna sigra. Því er yfirleitt auðsótt að minnka kröfur og velja það mikilvægasta til að vinna að heima.

Gott er að hafa eitthvert samskiptaform á milli heimilis og skóla eftir samkomulagi, t.d. samskiptabók eða tölvupóst, til að koma mikilvægum skilaboðum á milli varðandi heimanám og annað.

Einnig er gott að minna á fundi og fylgjast með að barnið fái þau úrræði sem eru fyrir hendi í skólanum, t.d. varðandi próftöku því kennarar hafa í mörg horn að líta.

Framhaldsnám

Þegar kemur að framhaldsnámi nemenda er mikilvægt að hvetja þá til að fara í það nám sem hugur þeirra stendur til og hjálpa þeim að leita leiða til þess.

Gott er að byrja í tíma að kynna sér nám framhaldsskóla, athuga námsframboð þeirra, hvaða þjónustu þeir veita og hvernig hægt er að nálgast hana.

© Helga Sigurmundsdóttir